ආරම්භය සහ පසුබිම

2005 වර්ෂයේදී ස්විට්සර්ලන්තයට වැඩම කළ පූජ්‍ය ලේඩියන්ගල සුදස්සි ස්වාමීන් වහන්සේගේ මූලිකත්වයෙන් හා මගපෙන්වීමෙන් මෙම විහාරස්ථානයේ මූලික අඩිතාලම වැටුණි. 2008 වසරේ සිට Herisau ප්‍රදේශයේ ස්ථාපිත වූ පින්බිම කේන්ද්‍ර කරගනිමින්, ස්විට්සර්ලන්තයේ වෙසෙන ශ්‍රී ලාංකික, තායි, වියෙට්නාම් සහ කාම්බෝජ ඇතුළු විවිධ ජාතීන්වල බෞද්ධ සැදැහැවතුන්ගේ ආගමික, සංස්කෘතික අවශ්‍යතා සපුරාලීමේ අරමුණින් මෙම විහාරස්ථානය ගොඩනැගුණි.

බුදුපිළිම වහන්සේ වැඩමවීම

බෞද්ධ දර්ශනය ප්‍රචලිත කිරීම හා සැදැහැවතුන්ගේ වන්දනාමානය උදෙසා ශ්‍රී ලංකාවෙන් අතිශය මනස්කාන්ත බුද්ධ ප්‍රතිමා වහන්සේ නමක් වැඩම කරවන ලදී. මේ සඳහා සූරිච් නුවර පදිංචි සරත් කුමාර මහතා සහ අනෝමා අධිකාරි මහත්මිය ශ්‍රද්ධාවෙන් යුතුව පූර්ණ දායකත්වය දැරූහ. 2009 ජනවාරි මස 01 වන දින, ගිහි පැවිදි විශාල පිරිසකගේ සහභාගිත්වයෙන් ප්‍රතිමා වහන්සේ නිරාවරණය කර, මහා සංඝගත දක්ෂිණාවක් පවත්වා St.Gallen මහා විහාරය නිල වශයෙන් ආරම්භ කරන ලදී.

ආගමික හා සංස්කෘතික මෙහෙවර

එතැන් සිට මේ දක්වා වසර ගණනාවක් පුරා, බෞද්ධ භික්ෂූන් වහන්සේ නමකගෙන් සමාජයට ඉටුවිය යුතු ආගමික, සාමාජික හා සංස්කෘතික සේවාවන් රැසක් විහාරස්ථානය මගින් අඛණ්ඩව ඉටුකරනු ලබයි:

• වාර්ෂික කඨින චීවර පූජා පින්කම් මහා සංඝරත්නයේ සහ සැදැහැවතුන්ගේ සහභාගිත්වයෙන් පවත්වනු ලබන උදාර පුණ්‍යකර්මයකි.
• වෙසක් උත්සව බුදුරජාණන් වහන්සේගේ තෙමඟුල නිමිත්තෙන් පවත්වනු ලබන ආමිස හා ප්‍රතිපත්ති පූජාවන්.
• සංස්කෘතික උළෙලවල් ශ්‍රී ලාංකික අනන්‍යතාවය සුරකිමින් පවත්වනු ලබන සිංහල හා දෙමළ අලුත් අවුරුදු උත්සව.
• ආශිර්වාදාත්මක පින්කම් සර්වරාත්‍රික පරිත්‍රාණ ධර්ම දේශනා සහ දානමය පින්කම් මගින් සැදැහැවතුන්ට ආශිර්වාද ප්‍රාර්ථනා කිරීම.

කෘතගුණ පූර්වක ස්තූතිය

2009 වසරේ සිට මේ දක්වා විහාරස්ථානයේ උභය අභිවෘද්ධිය උදෙසා ස්විට්සර්ලන්තය, ජර්මනිය සහ ඉතාලිය වැනි රටවල සිට නන් අයුරින් සහයෝගය දක්වන සියලුම ගිහි පින්වතුන්ටත්, වැඩම කරනු ලබන කල්‍යාණමිත්‍ර මහා සංඝරත්නයටත් අපගේ ගෞරවනීය ස්තූතිය පිරිනමමු. සදහම් සෙවනේ සිත් නිවාගන්නට ඔබ සැමට ගෞරවයෙන් ඇරයුම් කරමු!